Ümrə Nədir?

ÜMRƏ NƏDİR?
Ümrə kəlməsi; ziyarət etmək mənasına gəlir. Dini bir termin olaraq ümrə, “Müəyyən bir zamana aid olmadan ehrama girərək Kəbəni təvaf etmək, Səfa ilə Mərvə arasında səy etmək və təraş olub ehramdan çıxmaqdan” ibarətdir. Ömründə ən azı bir dəfə ümrə etmək sünnədir.

ÜMRƏNİN FƏRZLƏRİ: 

1. Ehrama girmək.
2. Kəbəni təvaf etmək.

ÜMRƏNİN VACİBLƏRİ: 

1. Səy etmək.
2. Saçları təraş etmək.

ÜMRƏNİN SÜNNƏLƏRİ: 

1. Ehrama girmədən əvvəl dırnaqları kəsmək, bədəndəki artıq tükləri təmizləmək.
2. Ehrama girmədən əvvəl qüsl almaq. Qüsl almaq mümkün olmadığı zaman dəstəmaz almaq.
3. İki rükət ehram namaz qılmaq.
4. Ləbbeyk duasını tez-tez oxuyaraq təkrarlamaq.

ÜMRƏYƏ NİYYƏT
Allahım! Mən ümrə ziyarəti etmək istəyirəm, onu mənə asanlaşdır və qəbul et. Ey aləmlərin Rəbbi olan Allahım!

TƏLBİYƏ (LƏBBEYK)
“Buyur Allahım buyur. Allahım! Sənin dəvətinə həmişə itaət edirəm. Sənin şərikin yoxdur. Əmr və dəvətinə səmimi qəlbdən tabe oluram. Şübhə yoxdur ki, həmd də, nemət də sənin üçündür. Mülk də sənindir. Sənin tayın və bənzərin yoxdur Allahım!”

ÜMRƏNİN VAXTI
Ümrə üçün müəyyən bir vaxt yoxdur. İstənilən vaxt edilə bilər. Lakin qurban bayramında Ərəfə günü səhərdən başlayıb bayramın dördüncü günü axşama qədər ümrə edilməsi məkruh sayılmışdır.

ÜMRƏ ZİYARƏTİNİN EDİLMƏ QAYDASI
Ümrə ziyarəti etmək istəyənlər zəruri hazırlıqları gördükdən və iki rükət namazı qıldıqdan sonra “Allahım! Sənin rizan üçün ümrə ziyarəti etmək istəyirəm. Bunu asanlaşdır və qəbul et.” deyə niyyət edib “təlbiyə” gətirərək ehrama girərlər. Bu şəkildə ehrama girdikdən sonra Kəbəni üsuluna (qaydalarına) riayət edərək təvaf edərlər. Nəhayət Səfa ilə Mərvə arasında səy etdikdən sonra təraş olub ehramdan çıxarlar. Ümrə ziyarətinə gedən zəvvar evindən çıxarkən bu duanı oxumalı və ziyarətinin xeyirli keçməsini Allahdan istəməlidir.

AYƏ VƏ HƏDİSLƏRLƏ ÜMRƏNİN FƏZİLƏTİ

Allah-Təala buyurur ki:

• “Orada aydın nişanələr – İbrahimın məqamı vardır. Oraya daxil olanın təhlükəsizliyi təmin olunar. Evi (Kəbəni) ziyarət etmək insanların – yoluna gücü çatan hər kəsin – Allah qarşısında borcudur. Kim (bunu) inkar edərsə, (bilsin ki,) Allahın aləmlərə ehtiyacı yoxdur.” (Ali-İmran, 97) 
• “Allah üçün həcc və ümrəni tam yerinə yetirin.”(əl-Bəqərə, 196) 
• “Həqiqətən, Səfa və Mərvə Allahın qoyduğu nişanələrdəndir. Kim evi (Kəbəni) həcc və ya ümrə (niyyəti ilə) ziyarət edərsə, bunları təvaf etməsində ona heç bir günah olmaz. Kim yaxşı bir iş görsə, (bilsin ki,) Allah əvəzini verəndir, Biləndir.” (əl-Bəqərə, 158)

Həzrət Peyğəmbər buyurur ki:

• “Allah-Təala (məqbul) iki ümrə arasında edilən (kiçik günahları) bağışlayar. Allah dərgahında qəbul olunan Həccin qarşılığı isə yalnız cənnətdir.” (Buxari-Müslim) 
• “Həcc və ümrəni ard-arda edin, çünki bu şəkildə edilən Həcc və ümrə körüyün dəmir, qızıl və gümüşdəki pası yox etdiyi kimi, kasıblığı və günahları yox edər. Qəbul edilən Həccin qarşılığı cənnətdir. Günəş gününü ehramlı və təlbiyə ilə keçirən mömin bəndəsinin günahları ilə birlikdə batırar və həmin insanı günahsız edər.” (Nəsəi, Tirmizi) 
• “Həcc və ümrəyə gedənlər Allahın seçilmiş qonaqlarıdır. Dua etdiklərində dualarını qəbul edər, tövbə edərlərsə, tövbələrini qəbul edər.” (Nəsəi, İbn Macə) 
• “Ramazan ayında edilən ümrənin savabı bir Həccin savabına bərabərdir.” (Əhməd ibn Hənbəl, İbn Macə) 
• “Məscidimizdə qılınan bir namaz, Məscidi Həram (Kəbə) xaric digər məscidlərdə qılınan min namazdan daha qiymətlidir. Məscidi-Həramda qılınan bir namaz digər məscidlərdə qılınan yüz mi min namazdan daha qiymətlidir.” (İbn Macə) 
• “Təlbiyə gətirən insana müjdə verilər, təkbir gətirən insana da müjdə verilər.” Əshabi Kiram soruşdu: “Ya Rəsulallah! Bu müjdə cənnətdirmi? Rəsulullah “Bəli” dedi.” (Təbərani)