Ehram Nədir?

Həcc və ya ümrə ziyarəti üçün Kəbəyə gedən zəvvarlar Miqat sərhədlərini keçməzdən əvvəl ehrama girməlidirlər. Ehram geyimi iki ədəd böyük dəsmaldan ibarətdir. Kişi zəvvarlar ehram hazırlıqlarını gördükdən sonra ehrama bu şəkildə girirlər; Münasib bir yerdə əvvəlcə paltarlar çıxarılır. Beldən aşağı bədənə sarılacaq ehram dəsmalını bel hissəsindən bağlayıb bir kəmər və ya iplə bərkidilir. Ehram dəsmalının ikinci hissəsi isə çiyinlərindən aşağıya doğru örtülür. Bu iki dəsmaldan başqa geyim olaraq heç bir şey zəvvarın üzərində qala bilməz. Baş açıq, ayaqlar isə yalın olmalıdır. Ayağa topuq tərəfi açıq bir tərlik (ləpik) geyinilir. Saat, eynək, üzük, kəmər və çanta kimi əşyaların istifadə olmasında bir problem (qəbahət) yoxdur.
Xanımlar üçün isə xüsusi ehramı geyimi yoxdur, onların ehramı əyinlərindəki libaslarıdır. Üzün açıq olması şərtiylə xüsusi bir rəng və model şərti olmadan bu libaslarla ehrama niyyət edirlər. Xanımlar üçün münasib olan daim təsəttürə uyğun olan geyim tərzidir. Ehramlar geyildikdən sonra iki rükət “ehram namazı” qılınır. Namazdan sonra ümrəyə niyyət edilir, sonra isə təlbiyə gətirilir.
Ümrə ziyarəti xanımların üzrlü halları olduğu günlərə təsadüf edərsə, onlar da eyni şəkildə ümrəyə niyyət edib təlbiyə gətirərlər. Lakin namaz qıla bilməz və təvaf edə bilməzlər. Üzrlü halları sona çatana qədər ehramda qalıb ehram qadağalarına diqqət etməlidirlər. Təmizləndikdən sonra qüsl alaraq ümrə vəzifələrini yerinə yetirərlər.

EHRAMIN FƏRZLƏRİ: 

1. Niyyət etmək.
2. Təlbiyə gətirmək.(Niyyət etdikdən sonra ləbeyk duasını oxumaq)

EHRAMIN VACİBLƏRİ: 

1. Miqat sərhədlərini keçməzdən əvvəl ehrama girmək.
2. Ehramlı ikən qadağan olunmuş əməllərdən çəkinmək.

EHRAMIN SÜNNƏLƏRİ:

1. Ehrama girmədən əvvəl dırnaqları kəsmək, bədəndəki artıq tükləri təmizləmək.
2. Ehrama girmədən əvvəl qüsl almaq. Qüsl almaq mümkün olmadığı zaman dəstəmaz almaq.
3. İki rükət ehram namaz qılmaq.
4. Ləbeyk duasını tez-tez oxuyaraq təkrarlamaq.

EHRAM QADAĞALARI
Həcc və ya ümrə ibadəti üçün ehrama girdikdən sonra digər vaxtlarda halal olan bəzi davranışlar ehramlı şəxslərə qadağan olunur. Bu qadağaların bəziləri aşağıdakılardır.

• Təraş olmaq, dırnaq tutmaq və ya bədəndən tük qoparmaq.
• Gözəl qoxu, ətirli sabun, şampun, nəm salfetka və s. istifadə etmək.
• Kişilərin tikişlə, hörgü və ya toxunma parça ilə bədənə görə biçilmiş paltar geyinmələri.
• Kişilərin baş və üz, qadınların isə üz və əl nahiyələrini örtmələri.
• Cinsi əlaqədə olmaq, şəhvani hissləri oyadacaq söz və davranışlar etmək.
• Mübahisə etmək, dalaşmaq.
• Otları və bitkiləri qoparmaq.
• Ov etmək, ovçuya ovu göstərmək, hər hansı bir canlını öldürmək.